Det endar 2-2 på Høddvoll etter ein heidundrande kamp mellom Hødd og Sogndal. Bortelaget gjekk i føringa to gongar, men Hødd utlikna kjapt ved begge høva. Det er også heimelaget som bør føle seg mest skuffa etter dette, for dei hadde meir enn nok sjansar til å ta alle poenga her. Spesielt ei periode i 2. omgang køyrde dei over laget til Tore André Flo, men Fij hadde fleire store avvergingar og resten av forsvaret reddar på streken ved fleire høve. Såleis føyer denne kampen seg inn i mange liknande resultat for Hødd den siste tida. Dei speler godt og skapar mange store sjansar, men sløsar for mykje. Dei tok rett nok innpå Jerv med eitt poeng, men det burde ha vore tre. Sogndal ligg på si side framleis på 6. plass, men no har Ranheim moglegheita til å kome tre poeng bak. Sebastian Eide og assistent Laurits Løken Eide takkar med dette for følgjet. Ha ein fin kveld vidare!